Dağılmış daş malikanələr, səssizliyə bürünmüş zəng qüllələri və köhnə kilsələr Yunanıstanın Köhnə Peritiya kəndinin mənzərəsini tamamlayır.

Viral.az “Express”ə istinadən xəbər verir ki, turist və müxbir Emili Rayt bu kəndi ziyarət edərək öz təəssüratlarını bölüşüb.

Qeyd edilir ki, bu kənd Korfu adasının ən yüksək zirvəsi olan Pantokrator dağı yaxınlığında yerləşir. Kənd sıx meşələrlə əhatə olunub və onun tikilməsi dəniz quldurlarının hücumlarından qorunmaq məqsədi daşıyıb.

Son Yazılar:

Köhnə Peritiya XIV əsrə aid çoxsaylı evləri ilə tanınır və Korfu adasının ən qədim yaşayış məntəqəsidir. Emili Rayt qeyd edib ki, XVII əsrin ortalarına qədər kənddə tamamilə əl əməyi ilə tikilmiş 130 ev mövcud olub.

Təxminən 1960-cı illərdə kənd sakinləri Köhnə Peritiyanı tərk edərək sahil bölgələrinə köçüblər. Yalnız 2010-cu ildə kənd yenidən canlanmağa başlayıb, yerli sakinlərin qayıdışı və turistlərin ziyarətləri ilə dolu olub.

Müxbir Emili Rayt bildirib ki, kənddə gəzinti insanı “keçmişə aparır”. Onun sözlərinə görə, Köhnə Peritiya həm təbii gözəlliyi, həm də unikal venesiya memarlığı ilə təəccübləndirir. Bununla yanaşı, kənd başqa bir dövrün qorxulu atmosferini də əks etdirir.

Rayt qeyd edib ki, Köhnə Peritiyada müxtəlif kənd ailələrinə məxsus səkkiz qədim və gözəl kilsə qorunub saxlanılıb. Bundan başqa, Yunanıstanın Mədəniyyət Nazirliyi hələ 1966-cı ildə kəndi tarixi abidə kimi tanıyıb.

Kənddə həmçinin, Korfu adasının ənənəvi yeməklərini təqdim edən bir neçə tavernaya rast gəlmək mümkündür. Ziyarətçilər köhnə, yararsız monastırlar yaxınlığında nahar edə və ev şərabından zövq ala bilərlər.

Məlumata görə, son illərdə kənddə bərpa olunan daşınmaz əmlak obyektlərinin sayı 15%-dən 35%-ə qədər artıb. Raytın sözlərinə görə, Köhnə Peritiya izdihamlı turistik yerlərdən uzaqda yerləşir və sakit istirahəti sevənlər üçün ideal məkandır.