Azərbaycan əsilli rəssam Bakıda sərgi keçirib

2003-cü ildə ABŞ-ın Kaliforniya ştatının Los Anceles şəhərində anadan olub, boya-başa çatan amerikalı rəssam Meltem Buyuranın Bakıda Azərbaycana həsr olunan “Gözlər köklərdə” adlı debüt rəsm sərgisi keçirilib.

Viral.az xəbər verir ki, sərgi iyunun 24-də baş tutub.

Son Yazılar:

Meltemin anası Azərbaycan, atası isə Türkiyə əsillidir. O, San Diego şəhəri Kaliforniya Universitetində (UCSD) psixologiya üzrə təhsil alır. Uşaqlıqdan incəsənətə marağı olan Meltem imtahan verərək Amerikanın ən çətin qəbul olunan məktəblərindən biri – Orange County School of the Arts liseyinə qəbul olaraq 4 il orada Film və Televiziya sahəsi üzrə təhsil alıb. Bu müddətdə o, bir neçə qısametrajlı bədii və sənədli film ərsəyə gətirib. Filmlərində əsasən insanların həyatı, onların saf duyğuları, sevinci, kədəri və sosial təsir mövzularına toxunub. Onun “Ghost Bike” sənədli filmi Amerikada iki önəmli film mükafatına layiq görülüb.

Meltem hələ uşaqlıqdan özünü sənət vasitəsilə ifadə etməyə başlayıb. Rəssamlıq üzrə təhsili olmamasına baxmayaraq, artıq bir neçə ildir sulu boya ilə rəsmlər çəkməyə başlayıb. ABŞ-da autizmli uşaqlarla davranış terapisti kimi işlədiyi müddətdə onlarla rəsm çəkərkən, bu sənətin insan psixologiyasına olan təsiri və faydasını analiz edərək, gələcəkdə psixologiya və təsviri sənəti birləşdirmək və insanlara faydalı olmaq qərarına gəlib.

“Gözlər köklərdə” sərgisi Meltemin ilk sərgisidir. Sərgidə yer alan əsərlər sulu və yağlı boya texnikası ilə işlənib. O, hər dəfə Azərbaycana gəlişi zamanı şəhər-şəhər, kənd-kənd dolaşaraq, maraqlı insanlarla tanış olmağı, onları seyr edib, hisslərini başa düşməyi xoşlayır. Sadə insanların rəsmlərini çəkərək onların daxili dünyasını rənglərlə ifadə etməkdən zövq alır. Sərgidə nümayiş olunan əsərlər Azərbaycanda yaşayan insanlar, onların gündəlik həyatı, ən əsası isə, üzlərində ifadə olunan hekayələri özlərində əks etdirir.

“Gözlər köklərdə” sərgisi iyul ayının 1-nə dək, Nizami 83 ünvanında yerləşən “Baraşka” qastrobarda sərgilənəcək.